Aufruf an das bairische Volk!

Aufruf an olle  Manna und Weiba, Oide und Junge, Schiache und Schene,

des Vattaland braucht uns! Indem das uns de bairische Regierung noamoi a Startbahn vor de Nosn hibaun wui, brauchds an Widastand damit de da drobn segn, dass so oafach a ned mit uns umspringa kinna und das uns des oafach ned bast. Basta. Und des muas Grund gmua sei, das wen uns des ned bast, das nacha da a a Rua sei muass.

Und weil de aber ums veracka koa Rua ned gem, miassn mia do nauf a Minga, dass ma eana de Wadl vierestein, dene Minista, dene. Und grad a so wia da Schmi vo Koche 1705 nach Minga nei und da Hofer Andrä a Insbruck, grad a so miassn mia am Samstag am 29. Oktober a Minga nauf zum demonstriern. Und damid mir mehra her machan, gema mir mit da Schütznfahna aufe, und mit unsara Schütznuniform, weils nämli allawei scho so war, dass wenn de Heimat bedrohd war, de Schützn eigsprunga sand. A de wo hoid koane ham, a de soin hoit nacha so mitgeh.
Und nacha, dass mir net scho hi san, bevor mir am Schlachtfoid om san, nema mir an Omnibus, der für de Schützenkamaradn vom Verein gschponserd werd und für de nomalen Leid so umara 5 Eiro kostn werd.
Indem es für an jedn braven Mo oder Wei eine Christenpflicht ist, doa mit´z demonstriern, moan an mia scho, dass mia an Haufa wern. Deszweng warats nacha guar, wenns uns sagn dadats, wer ois vo eich mitfahrn dadat mitn Omnibus.

Oiso, aufgehts, pack mas,  nauf a Minga.

Auf das unsa Schlachtruf hoasst: Gar nia net, na.

A. Filser
(Noachkommat vom kgl. bairischen Landtagsabgeordnetn J. Filser und sich soibiger Tradition verpflicht)